" ယပ်တောင်တစ်ချပ် "
ဇာတိဘ၀ ၊ နိဒါန်းစ၍
လောကကမ်းပါး ၊ လူသားတစ်ယောက်
တံခါးခေါက်သည်
" ဒေါက် ... ဒေါက် ... ဒေါက် ... ဒေါက်
တဒေါက်ဒေါက်နှင့် ... "
တစ်ယောက်တစ်ယောက် ၊ နောက်တစ်ယောက် နှင့်
ရောက်လာလို့မှ မကြာရသေး
" တေးသွားတစ်ပုဒ် စည်းမကိုက်မီ
နေခြည်သက်တံ့ ၊ လက်မဆန့်မီ "
ပန်းချီကားချပ် ၊ ဆေးရောင်စပ်တုန်း
ပြုံးကြ မဲ့ကြ ၊ ရယ် ငိုကြနှင့်
ချစ်ကြ မုန်းကြ ၊ နိုင်ရှုံးကြနှင့်
ဘ၀မြစ်တွင်း ၊ စုန်ဆန်ရင်းမှ
ပျင်းလို့လားမသိ
လင်းဖို့လားမသိ
နေညှိုးလို့လားမသိ
ရေချိုးဖို့လားမသိ
ပန်းခူးဖို့လားမသိ
လမ်းကူးဖို့လားမသိ
ရုတ်တရက်နှင့် ၊ ကသုတ်ကသက်
နှုတ်မဆက် . . . ကွဲ ၊ သည်လမ်းခွဲမှာ
ကဗျာလက်ဆောင် ၊ မျက်ရည်နှောင်ရင်း
ယပ်တောင်တစ်ချပ် ၊ စာတန်းကပ်၍
ပြဇာတ်တစ်ပုဒ် ၊ နိဂုံးချုပ်ပြီ
ဘယ်ဆီသို့လဲ
" သူမှလွဲ၍ မသိနိုင် "
" မှတ်တိုင်လမ်းခွဲ မျက်ရည်ဖြိုင် "
ဌေးကြည် (စလင်း)
( ၂၀၁၅ ခုနှစ် ဒီဇင်ဘာလထုတ် ငွေတာရီမဂ္ဂဇင်း ကဗျာကဏ္ဍ မှ )
No comments:
Post a Comment